Text

Chords:  Cm  G   Cm  Bb  Cm  G   Cm   
Rit.:   C   G7   

Ariva i barbari a cavalo
i ga do corni par capelo
xe 'na valanga che se buta
i ga la fame aretrata
i ga brusà tuto l'Impero
scampemo che i ne vol magnar.

Scampemo scampemo portemo le vache
le strasse, i peoci, i gati, le oche
monté tuti in barca ve spenzo col remo
sté fermi sinò se rebaltemo
stà bona Luisa no state dar pena
te trovo 'na casa fora in barena
bona Luisa 'na casa se trova

stanote dormimo soto da prova
stà bona coversi el fìo che tosse
doman magnaremo polenta e pesse.

E co 'sta barca e 'sta laguna
tira la rede che la xe piena
fa' pian Luisa che la se sbrega
vien su Venessia el sol la suga
ma vien marubio e i pirati
la nostra orada i s'à robà.

Co le scage i s'à fato 'na flota veloce
coi spini archi lance e frece
i squarta i te buta l'ogio che boge
el capo pirata se ciama Doge
e statue, i marmi, colone e ori
xe roba robada ai greghi e ai mori
i le ciama belesse ma mi gh'ò paura
par un toco de marmo i me manda in guera
nati de cani i xe pieni de schei
e mi e Luisa magnemo fasiòi

Venessia patria mia dileta
ti va de sgobo e po' de grata
sotto il vessillo di San Marco
par 'sta repubblica da sbarco
i m'à mandà parfin in Cina
a romperghe i cojoni a Gengis Kan

Se parte dal mondo co 'na carovana
varda Luisa che bela è la Cina
rassi colorati bachi da seda
la povere pirica la pansa de Buda
carica tuto fa su la tenda
el nostro paron cussì ne comanda
'sta carovana no la gh'ò capìa
semo cristiani e femo rassìa
Luisa che ladro che xe Marco Polo
cori che i mongoli ne core drio

In Adriatico che lote
le navi torna a casa rote
spense rabiosi i infedeli
che vol robarne i monopoli
de là in Atlantico la Spagna
el novo mondo la gh'à trovà

Cristoforo Colombo gh'aveva ragion
el mondo xe tondo come un balon
co la Nina la Pinta e la Santa Maria
el porta a casa l'oro e l'argenteria
America America tera pressiosa
ma i indiani xe gente che xe permalosa
ariva i velieri i canoni spagnoli
Atsechi e Inca xe ma sacrài
par cossa parché dovemo copar
me par una falce 'sta cristianità

Varda Luisa che malani
sciopa la guera dei trent'ani
me fasso fià e sigo basta
me 'riva in boca 'na tempesta
i fiumi porta le carogne
e l'aria ormai se gh'à impestà

Scampemo scampemo che 'riva la peste
rancura le robe dentro le seste
coversi el fio con un pano de lana
canta Luisa che fassa la nana
canta che i angeli buta 'na corda
che se tiremo su da 'sta merda
dormi bambin che 'ndemo su le stele
domani la Madona te da le caramele.